ലോകത്തിലെ ഏറ്റവും വലിയ സൗന്ദര്യമത്സരമായ മിസ്സ് യൂണിവേഴ്സ് വൻ പ്രതിസന്ധിയിൽ. തെക്കുകിഴക്കൻ ഏഷ്യയിലെ ശക്തരായ ആറ് രാജ്യങ്ങൾക്ക് — തായ്‌ലൻഡ്, ഇന്തോനേഷ്യ, വിയറ്റ്നാം, ലാവോസ്, മലേഷ്യ, സിംഗപ്പൂർ — ഈ വർഷത്തെ മിസ്സ് യൂണിവേഴ്സ് മത്സരത്തിൽ പങ്കെടുക്കാനുള്ള യോഗ്യത നഷ്ടപ്പെട്ടു.

ലോകമെമ്പാടുമുള്ള ദശലക്ഷക്കണക്കിന് ആരാധകരെ ആവേശത്തിലാഴ്ത്തുന്ന മിസ്സ് യൂണിവേഴ്സ് മത്സര ചരിത്രത്തിൽ ഇതുവരെ കാണാത്ത  പ്രതിസന്ധിയാണ് ഇത്തവണ ഉടലെടുത്തിരിക്കുന്നത്. മത്സരത്തിന്റെ 75-ാം പതിപ്പ് അരങ്ങേറാൻ ദിവസങ്ങൾ മാത്രം ബാക്കിനിൽക്കെയാണ് വിവാദ നീക്കം.

തായ്‌ലൻഡ്, ഇന്തോനേഷ്യ, വിയറ്റ്നാം, ലാവോസ്, മലേഷ്യ, സിംഗപ്പൂർ എന്നീ രാജ്യങ്ങളാണ് ഈ അപ്രതീക്ഷിത വിലക്കിന് ഇരയായിരിക്കുന്നത്. മിസ്സ് യൂണിവേഴ്സ് ഓർഗനൈസേഷന്റെ ഉടമസ്ഥാവകാശത്തെച്ചൊല്ലി തലപ്പത്തുള്ളവർ തമ്മിലുണ്ടായ കടുത്ത കോർപ്പറേറ്റ് തർക്കമാണ് പ്രതിസന്ധിക്ക് കാരണം. സ്വപ്നങ്ങളുടെ നെറുകെയിലെത്താൻ കഠിനാധ്വാനം ചെയ്തു കാത്തിരിക്കുന്ന മത്സരാർത്ഥികളുടെ ഭാവി  അനിശ്ചിതത്വത്തിലാണ്..

രണ്ട് ചേരികളായി തിരിഞ്ഞ സാമ്രാജ്യം

2022-ൽ തായ് മാധ്യമ ഭീമനായ 'ജെ.കെ.എൻ ഗ്ലോബൽ ഗ്രൂപ്പ്' (JKN Global Group) ആണ് ഈ ആഗോള ബ്രാൻഡ് സ്വന്തമാക്കിയത്. എന്നാൽ സാമ്പത്തിക പ്രതിസന്ധികളെ തുടർന്ന് 2024ന്റെ തുടക്കത്തിൽ മെക്സിക്കൻ വ്യവസായി റൗൾ റോച്ച കാന്റുവിന്റെ 'ലെഗസി ഹോൾഡിംഗ് ഗ്രൂപ്പിന്' (Legacy Holding Group)  50% ഓഹരികൾ  വിറ്റു. ഇതോടെയാണ് സംഘടനയ്ക്കുള്ളിൽ രണ്ട് വിഭാഗങ്ങൾ രൂപപ്പെട്ടു -  റൗൾ റോച്ച കാന്റുവിന്റെ നേതൃത്വത്തിൽ പടിഞ്ഞാറൻ പ്രദേശങ്ങളുടെ ഭരണം നിയന്ത്രിക്കുന്ന എം.യു വെസ്റ്റ് (MU West), 

തായ് മാധ്യമ വ്യവസായി നാവത് ഇറ്റ്സരഗ്രിസിലിന്റെ നേതൃത്വത്തിൽ 95 കിഴക്കൻ പ്രദേശങ്ങളുടെ ചുമതലയുള്ള എം.യു ഈസ്റ്റ് (MU East).

ഈ രണ്ട് ഗ്രൂപ്പുകൾ തമ്മിലുള്ള അധികാര വടംവലിയാണ് ഇപ്പോൾ തെക്കുകിഴക്കൻ ഏഷ്യൻ രാജ്യങ്ങളുടെ വിലക്കിൽ കലാശിച്ചിരിക്കുന്നത്. എം.യു ഈസ്റ്റ് വിഭാഗം നൽകിയ ദേശീയ ഫ്രാഞ്ചൈസി ലൈസൻസുകൾക്ക് നിയമസാധുതയില്ലെന്നും, അതിനാൽ ആറ് രാജ്യങ്ങളിൽ നിന്നുള്ള സുന്ദരികൾക്ക് മത്സരത്തിൽ പങ്കെടുക്കാൻ അർഹതയില്ലെന്നും 'എം.യു വെസ്റ്റ്' ഔദ്യോഗികമായി പ്രഖ്യാപിക്കുകയായിരുന്നു.

സാമ്പത്തിക ആരോപണങ്ങളും നിയമയുദ്ധങ്ങളും

ഉടമസ്ഥാവകാശ തർക്കം മാത്രമല്ല പ്രതിസന്ധിയുടെ കാരണം. മത്സരത്തിന് ആതിഥേയത്വം വഹിക്കുന്ന പോർട്ടോ റിക്കോയിലേക്ക് നൽകേണ്ടിയിരുന്ന ഫണ്ടിന്റെ കാര്യത്തിലും വലിയ തോതിലുള്ള അഴിമതി ആരോപണങ്ങൾ ഉയർന്നിട്ടുണ്ട്. പോർട്ടോ റിക്കോ സെനറ്റിന്റെ ടൂറിസം കമ്മിറ്റി ഈ വിഷയത്തിൽ ബാങ്ക് രേഖകൾ ആവശ്യപ്പെട്ട് അന്വേഷണത്തിന് ഉത്തരവിട്ടിരിക്കുകയാണ്. അതേസമയം, തനിക്കെതിരെയുള്ള എല്ലാ ആരോപണങ്ങളും ജെ.കെ.എൻ കമ്പനി ശക്തമായി നിഷേധിക്കുകയും, അപകീർത്തിപ്പെടുത്തിയതിന് എതിരെ നിയമനടപടി സ്വീകരിക്കുമെന്ന് മുന്നറിയിപ്പ് നൽകുകയും ചെയ്തിട്ടുണ്ട്.

കണ്ണീരിലായ മത്സരാർത്ഥികൾ

ഈ കോർപ്പറേറ്റ് കളിയുടെ ഏറ്റവും വലിയ ഇരകൾ ആറ് രാജ്യങ്ങളെ പ്രതിനിധീകരിച്ച് എത്തിയ മിസ്സ് യൂണിവേഴ്സ് സുന്ദരികളാണ്. മാസങ്ങളോളം നീണ്ട പരിശീലനം, ലക്ഷക്കണക്കിന് രൂപ മുടക്കിയുള്ള ഡിസൈനർ വസ്ത്രങ്ങൾ, രാജ്യത്തിന്റെ സംസ്കാരവും സൗന്ദര്യവും ലോകത്തിന് മുന്നിൽ അവതരിപ്പിക്കാനുള്ള തയ്യാറെടുപ്പുകൾ - ഇവയെല്ലാം ഒറ്റ ഉത്തരവിലൂടെയാണ് അട്ടിമറിക്കപ്പെട്ടത്.

"ഞാൻ പോകുന്നില്ല, പക്ഷേ മത്സരാർത്ഥികൾ തീർച്ചയായും പോകും," എന്ന് എം.യു ഈസ്റ്റ് സി.ഇഒ നാവത് ഇറ്റ്സരഗ്രിസിൽ  പത്രസമ്മേളനത്തിൽ വ്യക്തമാക്കി. വിലക്കുണ്ടെങ്കിലും മത്സരാർത്ഥികൾ പോർട്ടോ റിക്കോയിലേക്ക് പോകാൻ അദ്ദേഹം ആവശ്യപ്പെട്ടിട്ടുണ്ട്. ഈ നിലപാട് മത്സരാർത്ഥികളെ കൂടുതൽ ആശയക്കുഴപ്പത്തിലാക്കുകയാണ്:

ഈ ആറ് രാജ്യങ്ങൾക്ക് പ്രവേശനം നിഷേധിച്ചാൽ തങ്ങളുടെ പിന്തുണ പ്രഖ്യാപിച്ച് മറ്റ് കിഴക്കൻ രാജ്യങ്ങളും മത്സരത്തിൽ നിന്ന് വിട്ടുനിൽക്കാൻ സാധ്യതയുണ്ടെന്നും മുന്നറിയിപ്പുണ്ട്.

ആരാധകരുടെ രോഷം

തെക്കുകിഴക്കൻ ഏഷ്യയിൽ മിസ്സ് യൂണിവേഴ്സ് എന്നത് വെറുമൊരു മത്സരമല്ല; അതൊരു വികാരമാണ്. ദശലക്ഷക്കണക്കിന് ആരാധകരാണ് ഈ രാജ്യങ്ങളിൽ പേജന്റ് ഷോകളെ പിന്തുണയ്ക്കുന്നത്.

ബാങ്കോക്ക്, മനില, ജക്കാർത്ത, ക്വാലാലംപൂർ തുടങ്ങിയ നഗരങ്ങളിലെ ആരാധകർ ഇതിനകം തന്നെ സോഷ്യൽ മീഡിയകളിൽ ശക്തമായ പ്രതിഷേധവുമായി രംഗത്തെത്തി. #StandWithSoutheastAsia എന്ന ഹാഷ്‌ടാഗ്  ട്രെൻഡിങ് ആയിക്കഴിഞ്ഞു. കോർപ്പറേറ്റ് ഗ്രൂപ്പുകളുടെ സ്വാർത്ഥ താൽപ്പര്യങ്ങൾക്കായി ഒരു പറ്റം പെൺകുട്ടികളുടെ സ്വപ്നങ്ങളെ ചവിട്ടിമെതിക്കുന്നതിനെതിരെ കടുത്ത അമർഷമാണ് ആരാധകർ പ്രകടിപ്പിക്കുന്നത്.  മത്സരത്തിന്റെ റേറ്റിംഗും ആഗോളതലത്തിലുള്ള പ്രശസ്തിയും വൻതോതിൽ ഇടിയാൻ സാധ്യതയുണ്ട്.

ഇനി എന്ത് സംഭവിക്കും? 

പോർട്ടോ റിക്കോയിൽ മത്സരത്തിന്റെ പ്രാഥമിക ഘട്ടങ്ങൾ ആരംഭിക്കാൻ ദിവസങ്ങൾ മാത്രം ബാക്കിനിൽക്കെ, ഇരുവിഭാഗങ്ങളുടെയും നിയമോപദേശകർ കോടതികളിൽ പോരാട്ടം തുടരുകയാണ്. സമയബന്ധിതമായ ഒരു ഒത്തുതീർപ്പോ അല്ലെങ്കിൽ കോടതിയുടെ അടിയന്തര ഉത്തരവോ ഉണ്ടായില്ലെങ്കിൽ, ചരിത്രത്തിലാദ്യമായി ഏഷ്യയിലെ ഏറ്റവും കരുത്തരായ രാജ്യങ്ങളുടെ പ്രതിനിധികളില്ലാതെ മിസ്സ് യൂണിവേഴ്സ് കിരീടധാരണം പൂർത്തിയാക്കേണ്ടി വരും.

ഇത് ഈ ആഗോള സംഘടനയുടെ വിശ്വാസ്യതയ്ക്ക് ഏൽപ്പിക്കാൻ പോകുന്ന കളങ്കം ചെറുതായിരിക്കില്ല. സൗന്ദര്യത്തിന്റെയും ശാക്തീകരണത്തിന്റെയും വേദിയെന്ന് അവകാശപ്പെടുന്ന മിസ്സ് യൂണിവേഴ്സ്, ഇന്ന് കോർപ്പറേറ്റ് യുദ്ധത്തിന്റെ കളിപ്പാവയായി മാറിയിരിക്കുന്നു എന്നതാണ് യാഥാർത്ഥ്യം.